Тэйт Британи музей 2026 оны Тернерийн шагналд нэр дэвшигчдийг зарлалаа
Их Британийн хамгийн нэр хүндтэй урлагийн шагнал болох Тернерийн шагналд нэр дэвшигчид тодорлоо.
Нэрт зураач Ж.М.В. Тернерийн (1775–1851) нэрэмжит энэхүү шагналыг 1984 оноос хойш олгож эхэлсэн бөгөөд жил бүр Их Британийн уран бүтээлчийн үзэсгэлэн эсвэл онцгой бүтээлийг нэр дэвшүүлэн, ялагчийг тодруулдаг байна.
Тернерийн шагналын ялагч 25,000 фунт стерлингийн шагнал хүртэх бөгөөд нэр дэвшсэн бусад уран бүтээлч тус бүр 10,000 фунт стерлингийн шагнал авна.
Тернерийн шагналыг эздээр өмнөх жилүүдэд дэлхийд танигдсан уран бүтээлчид болох Аниш Капур, Дэмиен Хирст, Жереми Деллер, Стив МакКуин мөн 61 дэх Венецийн биеннальд Их Британийг төлөөлж буй уран бүтээлч Лубайна Химид нар шалгарч байжээ.
Тэгвэл Тэйт Британи музейн зүгээс 2026 оны Тернерийн шагналд нэр дэвшиж буй дөрвөн уран бүтээлчийг зарлаад байна.
Зүүн: Уран бүтээлч Симеон Баркли. Баруун: Симеон Баркли Хэпворт Вэйкфилд музейд. Гэрэл зургийг: Симеон Баркли ба Workplace
Симеон Баркли (Simeon Barclay)
Симеон Баркли нь Робертс Урлагийн Институтын захиалгаар бүтээж, Орчин Үеийн Урлагийн Институт (Institute of Contemporary Arts), Хэпворт Вэйкфилд зэрэг урлагийн байгууллагуудад толилуулсан “The Ruin” нэртэй перформанс ажлаараа нэр дэвшжээ.
Нэг цаг үргэлжлэх энэхүү үг ярианы перформанс нь уран бүтээлчийн Английн хойд хэсэг болох Хаддэрсфилд хотод өссөн амьдралын туршлага, тухайн бүс нутгийн аж үйлдвэржсэн орчинд өнгөрөөсөн бага насны дурсамжаас сэдэвлэсэн ажил юм. Шүүгчид түүний перформансыг хэл яриаг ашигласан шинэлэг туршилт ба гүнзгий сэтгэгдэл төрүүлэм дуу авиатай хослуулан Британийн анги давхарга, арьс өнгөний асуудлуудыг хөндсөн хэмээн өндрөөр үнэлсэн байна.
Зүүн: Уран бүтээлч Кира Фреижэ. Баруун: “Unspeak the Chorus” үзэсгэлэн, Хэпворт Вэйкфилд. Гэрэл зургийг: Робин Бэрнстэйн, Люис Роналд.
Кира Фреижэ (Kira Freije)
Кира Фреижэгийн хувьд Хэпворт Вэйкфилд музейд гарсан анхны бие даасан “Unspeak the Chorus” үзэсгэлэнгээрээ нэр дэвшиж байна. Тэрээр металл, даавуу болон олдмол материалуудыг ашиглан хүний нийтлэг сэтгэл хөдлөлийг судалсан баримлууд бүтээдэг. Шүүгчид Кира Фреижэгийн бүтээлийн материал болон өвөрмөц баримлын хэллэгийг нь онцолсон төдийгүй дүрүүдийг байршуулсан явдал нь сэтгэл түгшээж, орон зайг хүчтэй байдлаар хувиргасан хэмээн тэмдэглэжээ.
Зүүн: Уран бүтээлч Маргэритэ Хюмэй. Баруун: “Torches” үзэсгэлэн, ARKEN Орчин үеийн урлагийн музей. Гэрэл зургийг: Жулия Андрэон ба Флорин Бонавентюр, Матилда Агиус.
Маргэритэ Хюмэй (Marguerite Humeau)
Маргэритэ Хюмэй нь Копенхаген хотын ARKEN Орчин үеийн урлагийн музей ба Хэлсинкигийн Урлагийн Музейд толилуулсан “Torches” нэртэй бие даасан үзэсгэлэнгээрээ нэр дэвшиж байна.Түүний бүтээлүүд амьдрал бүрэлдэн тогтсон цаг үеэс авхуулаад төсөөллийн ирээдүйн ертөнцүүдийг судалдаг. Маргэритэ Хюмэйийн баримлууд нь амьтан, ургамлын тодорхой хэлбэрүүдийг өөр ертөнцийн мэт дүрслэлтэй хослуулан, гэрэл ба дуу авианы давталттай орчинд байрлуулдаг байна. Энэхүү инсталляц нь хүн төвтэй бус байгаль төвтэй хандлагыг илэрхийлж, байгалийн нандин холбоог харуулахыг зорьжээ. Шүүгчид түүний кино шиг дэглэсэн үзэсгэлэнгийн хэлбэрийг өндрөөр үнэлж, бүтээлүүд нь байгаль экологийн болон оршихуйн сэдвүүдийг шинэлэг хэлбэр, таамаглалаар дамжуулан судалсныг онцолсон байна.
Баруун: Таноа Сасраку. Баруун: “Morale Patch” үзэсгэлэн, Орчин Үеийн Урлагийн Институт. Гэрэл зургийг: Бэлинда Лавли, Жак Эллиот.
Таноа Сасраку (Tanoa Sasraku)
Таноа Сасраку нь Орчин Үеийн Урлагийн Институтэд (Institute of Contemporary Arts) зохион байгуулагдсан “Morale Patch” нэртэй бие даасан үзэсгэлэнгээрээ нэр дэвшсэн. Энэхүү инсталляц нь эд зүйлсийг санагдуулам баримлууд, цаасан дээрх ажлууд болон кино ашиглан геополитикийн асуудлуудыг хөнджээ. Таноа Сасраку газрын тосны төлөөх улс төрийн тэмцэл, дайн тулааны түүхийг үзэсгэлэнгийн гол санаа болгон авч үзжээ. Шүүгчид уг инсталляцын боловсронгуй байдлыг өндрөөр үнэлж, түүхэн төвөгтэй асуудлуудыг хүчтэй утга агуулгатай холбон гаргасныг онцолжээ.
