Жан-Мишэл Баскиатын бүтээл 45 сая ам.долларын үнэд хүрч магадгүй
Жан-Мишэл Баскиатийн (1960-1988) 1983 онд зурсан “Museum Security (Broadway Meltdown)” бүтээл Нью Йоркийн Сотебисын орчин үеийн урлагийн дуудлага худалдаагаар энэ 5-р сард зарагдах гэж байна. Өндөр эрэлттэй тус бүтээл арав гаруй жилийн дараа анх удаа дахин дуудлага худалдаанд тавигдаж байгаа бөгөөд 45 сая ам.доллар хүрнэ гэж тооцоолж байгаа юм.
1983 онд Лос Анжелес хотод амьдарч байх үедээ Жан-Мишэл Баскиат том хэмжээтэй арван хоёр бүтээл туурвисны нэг нь “Museum Security (Broadway Meltdown).” Энэхүү цувралын бас нэгэн хэсэг болох “Hollywood Africans” бүтээл нь өдгөө Витни Америкийн Урлагийн музейд хадгалагддаг. Тухайн жил 22 настай Баскиат мөн Витни Биеннальд оролцож, хамгийн их анхаарал анхаарал татсан уран бүтээлч болж байсан билээ. Иймд “Museum Security (Broadway Meltdown)” бүтээл түүний уран бүтээлийн оргил үеийг илтгэх бөгөөд түүний дүрслэлийн хэл болон илэрхийллийн хувьд зоримог, том цар хүрээтэй болсон үеийг харуулдаг.
Жан-Мишэл Баскиат 1988 онд 27 насандаа таалал төгссөнөөс хойш цуглуулагчид түүний зургийг өөрийн болгохын төлөө булаацалдсаар ирсэн. Түүний гавлын ясан дүрслэл бүхий “Untitled” (1982) бүтээл 2017 онд Сотебисын дуудлага худалдаагаар 110.5 сая ам.долларын үнэд хүрж шуугиан дэгдээж байжээ. Үүгээрээ ч 2022 он хүртэл Жан-Мишэл Баскиат нь дуудлага худалдаагаар зарагдсан бүтээлээрээ түүхэнд хамгийн өндөр үнэд хүрсэн Америк уран бүтээлч хэмээн нэрлэгдэж байв.
Хамгийн сүүлд “Museum Security (Broadway Meltdown)” зураг Сөүл хотын Донгдэмүн Дизайн Плаза музейд зохион байгуулагдсан “Signs: Connecting Past and Future” үзэсгэлэнд тавигдсан байна. Бүтээл маргаашаас эхлэн 3-р сарын 15 хүртэл Мет Броер музейд болох тусгай үзэсгэлэнд дэлгэгдэх бөгөөд дараа нь Хонг Конг, Лос Анжелес, Лондон хотуудаар аялна. Үзэсгэлэнд оролцож дууссаны дараа Нью Йорк хотод эргэн ирж, энэ тавдугаар сард болох Сотебисын нэр хүндтэй оройн дуудлага худалдааны өмнөх үзэсгэлэнд дахин дэлгэгдэх юм байна.
