Залуу уран бүтээлч Б.Отгонжаргал дотоод сэтгэлийн “Хөх тал”-аа Монголын уран зургийн галерейд толилуулж байна

Хөх тал

Монголын уран зургийн галерей

Улаанбаатар, Монгол улс

2026.04.11 - 2026.04.19

Залуу уран бүтээлч Базардарын Отгонжаргал Монголын уран зургийн галерейд гарч буй “Хөх тал” анхны бие даасан үзэсгэлэнгээрээ дамжуулан дурсамж ба мартагдал, хоосрол ба боломж зэрэгцэн орших дотоод сэтгэлийн тал нутаг, уудам орон зайг илэрхийлжээ. Түүний хувьд “Хөх тал” бол уран бүтээлийн эхлэл төдийгүй бие даасан хэл, концепцийн чиглэлийг тодорхойлсон үзэсгэлэн юм.

“Хөх тал” үзэсгэлэнд дэлгэгдсэн модон баримлууд хүний бие, орон зай, санамжийн харилцааг судална. Бүтээлүүдэд хүний биеийг бүхэлд нь бус, харин гар, хөл, нуруу, гавлын яс зэрэг фрагмент хэсгүүдээр илэрхийлснээр оршихуйн задрал, дурсамжийн тасалдлыг өгүүлжээ. 

Уран бүтээлч модыг цаг хугацааг хадгалагч “амьд үлдэгдэл” хэмээн үзэж, бүтээлүүддээ модны байгалийн ширхэг, ан цав, барзгар гадаргууг хадгалсан нь тэдгээрийг археологийн олдвор мэт мэдрэмжтэй болгож, өнгөрсөн ба одоо цагийн хөндсөн давхар утгыг бий болгож байна. Мөн амьтан ба хүний дүрсийн завсрын, товчилсон хэлбэрүүд нь нүүдлийн соёл, байгаль, хүний дотоод ертөнцийн холбоог илэрхийлж, танигдахуйц атлаа гажуудсан дүрслэлүүд нь үзэгчийг харахаас илүү мэдрэх, дотоод орон зайтайгаа холбогдоход чиглүүлнэ. 

Б.Отгонжаргал нь 2008 онд Дүрслэх Урлагийн Дээд Сургуулийг зураач, уран сийлбэрч мэргэжлээр төгссөн. Тэрээр сийлбэрийн урлагийн чиглэлээр тасралтгүй уран бүтээл туурвиж буй “Дөрвөлжин Дугуй” арт нэгдлийн гишүүн юм. Түүний уран бүтээлүүд нь үндэсний өв соёл, орчин үеийн дүрслэлийн арга барилыг хослуулсан өвөрмөц хэлбэр, найруулгаар онцлог бөгөөд сүүлийн жилүүдэд Монгол болон олон улсын уран бүтээлчдийн хамтарсан хөтөлбөр, үзэсгэлэн, фестивалуудад амжилттай оролцон түүхтэй. Тухайлбал БНХАУ-ын Харбин хотод болсон олон улсын мөс, цасан сийлбэрийн фестивальд мөсөн сийлбэрээр хоёр удаа 2-р байр, цасан сийлбэрээр 2 болон 3-р байрын эзэн болж байсан. Мөн ОХУ-ын Ангарск болон Лукоморе хотуудад болсон модон баримлын фестивалиудад шагналт байруудыг эзэлж байжээ.

“Хөх тал” үзэсгэлэн 2026 оны 4 дүгээр сарын 11-19-ний өдрүүдэд олон нийтэд нээлттэй үргэлжилнэ.