Уран бүтээлч Б.Бат-Эрдэнэ “Савдаг” үзэсгэлэнгээ CAB орон зайд нээлээ
Савдаг IIII.I
CAB урлагийн орон зай
Улаанбаатар, Монгол улс
2026.03.10 - 2026.03.14
“Савдаг IIII.I” үзэсгэлэн нь уран бүтээлч Батчулууны Бат-Эрдэнэ буюу BAAG-ийн тав дахь бие даасан үзэсгэлэн бөгөөд савдаг хэмээх сэдвийг хөндсөн дөрөв дэх бие даасан үзэсгэлэн юм. Савдаг нэрийн дор өмнө нь "Тэнгэрт нэгэн удаа (2018), Хүүднэс (2022), Амилалт (2023) гэсэн гурван үзэсгэлэн толилуулж байсан билээ. Газар усны эзэд гэгддэг савдгийн удаах хувилбараа тэрээр САВ урлагийн орон зайд ил болгож байна. Уран бүтээлчийн тайлбарласнаар "Cавдаг өөрийг нь ойлгохгүй, хүн төрөлхтөн савдгийг яаж ойлгохоо мэдэхгүй байгаа учраас өөр өөр хэлбэрээр гарч ирсээр л байна."
Дэлхий ертөнц тэр чигтээ ус байсан талаар бага насандаа нэгэн хичээл дээр сонссоноос хойш энэ ойлголт Б.Бат-Эрдэний ой санамжид тодоор бичигдэн үлджээ. Үүнээс үүдэн түүний хувьд ертөнц өөрөө ус байгаад, уснаас үүссэн юм бол ус бол тархи юм байна гэсэн бодлоос энэ удаагийн савдаг бий болсон бөгөөд өмнөх бүтээлүүдтэй нь мөн уялдана.
2021 онд Хөх Нар Монголын Орчин Үеийн Урлагийн Төвийн зүгээс Төв аймгийн Алтанбулаг сумын нутагт зохион байгуулсан Булаг Арт Кэмп 2021-д оролцох үеэр Б.Бат-Эрдэний бүтээсэн “Ус” бүтээлд ус бол тархи гэх санаа өмнө мөн илэрч байсан. Туул голын ай сав газар болон хүрээлэн буй орчин нь Улаанбаатар хотоос улбаалан ихэд гэмтэж, голын ус бохирдолтой, эргэн тойрны мод хөх сааралтаж, хүйтэн өнгөтэй болсныг хараад хүн шээх болгондоо тархи руугаа шээж байгаа юм байна гэх бодол төржээ. Булаг Арт Кэмпд оролцож байх үеийн аагим халуунд хажуугаар урсаж байсан голын усанд шумбаад ормоор байвч цэвэр тунгалаг усгүйн улмаас таван литрийн цэвэр усны савыг бөөрнөөс нь цоолон хүйтэн ус хийж, хөлөө дүрэх сэдэл төрж, үйлдлийн болон олон нийтийг хамруулсан “Ус” нэртэй ажлаа гүйцэтгэсэн байна.
Материалын хувьд өмнө нь савдаг керамикаар илэрч байсан бол энэ удаад уран бүтээлч загасны яс, куб хэлбэрийн карказан дотор нарийн тогтолцоо, тэнцвэрийг олж татсан утас, гэрэл болон проекторын тусгал ашиглажээ. Тэрээр загасны ясыг анх удаа ашигласан бөгөөд лусын амьтны элементийг ашигласнаараа усны эзэн савдаг ямар байж болохыг үзэгчдэд харуулна. Савдгийг агаарт хөөргөх утаснууд нь бурхан зургийн тигийг санагдуулах бөгөөд амин судлыг нь улаан утсаар ялгаж өгсөн нь тун онцлог. Б.Бат-Эрдэнэ удаагийн савдгаараа дамжуулан хурц, хэрцгий бус нандин, хэврэг тогтолцоог илэрхийлэхийг зорьжээ.
“Савдаг IIII.I” үзэсгэлэнд тусгайлан зориулсан дуу авианы бүтээлийг уран бүтээлч О.Анхбаяр зохиосон байна. Түүний хувьд Б.Бат-Эрдэний бүтээлийн элементүүд, утсан дээр гүйлдэх гэрлийн тусгалын хэмнэл, савдаг тус бүрийн хэлбэр, оршин буй орон зайнаас мэдэрсэн мэдрэмжээ дуу авиагаар илэрхийлсэн нь үзэсгэлэнгээс авах мэдрэмжийг улам тодосгоно.
Уран бүтээлч Б.Бат-Эрдэнэ нь 1983 онд Улаанбаатар хотноо төрж өссөн, баримал, видео, инсталляц зэрэг олон төрлийн медиаг хослуулан бүтээлээ туурвидаг уран бүтээлч. Тэрээр Монголын Урлагийн зөвлөлийн Улаан гэр, ХААН Банкны галерей, 976 галерей, Г.Занабазарын нэрэмжит Дүрслэх урлагийн музей, MN17 галерей болон Плэйтайм наадам, Чойжин Ламын музейн гадаа орон зайд бүтээлүүдээ толилуулж байжээ. Мөн Улаанбаатар олон улсын медиа урлагийн наадам, Голландын Today’s Art Festival, Норвегийн Insomnia Festival, Солонгосын Чонжу Биенналь, Лэнд Арт Монголиа Биенналь зэрэг олон улсын үзэсгэлэн, арга хэмжээнд уригдан оролцож байсан туршлагатай уран бүтээлч юм.
“Савдаг IIII.I” үзэсгэлэн 2026 оны 3-р сарын 14-ний өдөр хүртэл САВ урлагийн орон зайд гарна.
