Уран бүтээлч Б.Бат-Эрдэнэ БААГ-ийн "Савдаг" B Contemporary Art Gallerу-д эргэн ирлээ

Б.Бат-Эрдэнэ "БААГ"

САВДАГ IIII.II

2026.06.12 - 2026.06.28

B Contemporary Art Gallery

Уран бүтээлч Б.Бат-Эрдэнэ буюу БААГ нь 2023 онд B Contemporary Art Gallery-д дэлгэсэн “Амилалт” үзэсгэлэнгээрээ уламжлалт дүрслэлийн нарийн гүйцэтгэл, бэлгэдэлт өгүүлэмжийг өөрийн мэдрэмжээр дахин тайлбарлаж байсан бол “Савдаг” нь түүний уран бүтээлийн сэтгэлгээ шинэ хэмжээс рүү шилжсэнийг илтгэнэ.

Энэхүү шилжилт нь зөвхөн сэдвийн өөрчлөлт бус, дүрслэлийн хэл, материалын сонголт, орон зайтай ажиллах арга барилын шинэ эрэл хайгуул юм. БААГ-ийн энэ удаагийн бүтээлүүдэд нимгэн төмөр карказаар бүтээсэн куб бүтэц дотор загасны нарийн ясыг эвлүүлэн байгуулсан, танил атлаа үл таних шинэ дүрүүд оршино. Тэдгээр монгол зургийн бурхадын дүрслэлд харагддаг тэгш хэмт зохион байгуулалт, нарийн шугаман хэмнэлийг санагдуулах утсан бүтэц дунд амь орсон мэт үзэгдэнэ.

БААГ монгол зургийн мэргэжлээр суралцсан бөгөөд монгол зураг нь нарийн зураас, бийрийн даралтын ялгаагаар хавтгай гадаргуун дээр орон зайн мэдрэмжийг бүтээдэг бол “Савдаг” үзэсгэлэнд энэ ойлголт бодит хэмжээст хэлбэрт шилжжээ. Видео дүрсний жирэлзэх, бүдгэрэх, давхцах, тасалдах зэрэг эффектүүд гэрэл, хөдөлгөөний тусламжтайгаар дүрслэлийг тогтворгүй атлаа амьд төлөвт оруулж, үзэгчийг бүтээлийн дотоод орон зайд татан оролцуулна.

Монгол зургийн сургалтын нарийн дэг, нягт ажиллагаа түүний бүтээлүүдэд өнөө хэр хадгалагдсаар байна. Анхны харцаар анзаарагдахгүй өнгөрч болох жижиг хэсгүүд хүртэл өөрийн гэсэн бүтэц, утга агуулгатай бөгөөд бүтээлд ойртох тусам шинэ дүрс, холбоос, давхаргуудыг нээж өгнө.

Цагаан утсан бүтэц дунд зохиомжийн төвд шингэсэн улаан утас онцгой анхаарал татна. Тэр нь амь судал мэт, үл үзэгдэх эрчим хүчний урсгал мэт, эсвэл оршихуйн хамгийн эмзэг бөгөөд хүчирхэг цэг мэт мэдрэгдэнэ. Загасны яснаас бүтсэн шинэ дүрүүдийг нэвтлэн, утсан орон зайг холбон зангидах энэ улаан амь нь хөдөлгөөнгүй мэт дүрслэлд амьсгал оруулж, бүтээлийн дотоод хэмнэлийг тэтгэнэ. Хэрэв цагаан утаснууд нь орон зай, дурсамж, цаг хугацааны үл үзэгдэх сүлжээ бол улаан утас нь түүний дундуур цохилох амьдралын хэмнэл юм.

“Савдаг” нь уламжлал ба орчин үе, хавтгай ба хэмжээст орон зай, харагдах ба үл харагдах ертөнцийн зааг дээр орших үзэсгэлэн. Үзэгч бүтээл бүрийг тойрон алхах тусам тэдгээрийн нарийн бүтэц, давхар утга, эмзэг хөдөлгөөнийг шинээр нээж, харагдах зүйлсийн цаана орших үл үзэгдэх холбоог өөрийн мэдрэмжээр танин мэдрэх боломжтой.