Ннена Калу 2025 оны Тернерийн шагналын эзэн боллоо
Уран бүтээлч Ннена Калу Тернерийн шагналыг хүртсэн анхны хөгжлийн бэрхшээлтэй уран бүтээлч болжээ.
Ннена Калу Их Британийн хамгийн нэр хүндтэй урлагийн шагнал болох Тернерийн шагналыг эзэн болж тус шагналыг хүртсэн суралцах бэрхшээлтэй анхны зураач гэдгээрээ түүхэнд бичигдлээ.
Тус шагналыг Их Британи улсын 2025 оны соёлын хот болох Брэдфорд хотод болсон ёслолын үеэр 25,000 фунт стерлингийн мөнгөн шагналын хамт гардуулжээ.
1966 онд Глазгоу хотод Нигер гаралтай эцэг эхийн гэр бүлд төрсөн Ннена Калу нь аутизмтай ба хэл ярианы бэрхшээлтэй уран бүтээлч юм. Тэрээр Тернерийн шагналд нэр дэвшсэн анхны хөгжлийн бэрхшээлтэй уран бүтээлч болж тэргүүн байр эзэлсэн нь хөгжлийн бэрхшээлт уран бүтээлчдийн хувьд болон урлагийн ертөнцөд тохиосон түүхэн үйл явдал боллоо.
Ннена Калу 1999 оноос хойш Лондонд байрлах Акшин Спэйс ашгийн бус байгууллагатай хамтран уран бүтээлээ туурвисаар иржээ. Харин саяхнаас л түүний бүтээлүүд урлагийн зах зээлд танигдаж эхэлсэн бөгөөд өнгөрсөн жил Лондонгийн Аркадия Мисса галерей түүнийг төлөөлөн хамтран ажиллаж эхэлсэн байна.
Английн Брэдфорд хотод дэлгэгдсэн үзэсгэлэнд түүний онцлох бүтээл болох хуурцгийн хальс, даавуу, олс, цаас зэрэг уламжлалт бус материалаар хийсэн хүр хорхойн үүртэй төстэй баримлууд болон зураасан зургийн бүтээлүүд нь шүүгчдийн болон олны анхаарлыг татжээ.
Энэ жилийн шүүгчдийн багийг Тэйт Британи музейн захирал Алекс Фаркухарсон удирдан ажиллаж, бие даасан куратор Эндрю Бонацина, Ливерпүл Биенналийн захирал Сэм Лаки, Үндэсний галерейд орчин үеийн болон орчин үеийн төслүүдийн туслах куратор Прийеш Мистри, Фицвильямын музейн орчин үеийн болон орчин үеийн урлагийн ахлах куратор Хабда Рашид нар мөн шүүгчдийн бүрэлдэхүүнд багтжээ.
Мөн шагналд өрсөлдсөн бусад нэр уран бүтээлчид болох Рене Матич, Задие Ха, Мохаммед Сами нар нь тус бүр 10,000 фунт стерлингийн шагнал гардан авах аж.
Тернерийн шагналд нэр дэвшсэн дөрвөн уран бүтээлчдийн бүтээлүүд Картрайт Холл галерейд дэлгэгдсэн ба үзэсгэлэн 2026 оны 2-р сарын 22 хүртэл үргэлжилнэ.
Тернерийн шагналыг эздээр өмнөх жилүүдэд Лубайна Химид, Жереми Деллер, Грэйсон Перри, Стив МакКуин, Дэмиен Хирст, Аниш Капур нар шалгарч байжээ.
