Солонгос ба Монгол уран бүтээлчдийн "Бие биедээ тусах гэрэл"
БНСУ-ын Гванжу хот ба тус хотын шилдэг уран бүтээлчдийг хилийн чанадад сурталчлах зорилгоор зохион байгуулагддаг "Соёлт хот Гванжу" үзэсгэлэн 2026 онд Улаанбаатар хотноо "Бие биедээ тусах гэрэл" нэртэйгээр Уран Зургийн Галерейд гарч байна.
Бие биедээ тусах гэрэл
Монголын уран зургийн галерей
2026.06.03 - 2026.06.25
БНСУ-ын Гванжу хот ба тус хотын шилдэг уран бүтээлчдийг хилийн чанадад сурталчлах зорилгоор зохион байгуулагддаг "Соёлт хот Гванжу" үзэсгэлэн 2026 онд Улаанбаатар хотноо "Бие биедээ тусах гэрэл" нэртэйгээр Уран Зургийн Галерейд гарч байна. Энэхүү цуврал үзэсгэлэн нь 2015 оноос хойш БНХАУ-ын Гуанжоу, АНУ-ын Сан Антонио, ХБНГУ-ын Берлин, Япон улсын Фүкүока, Итали улсын Торино, Тайланд улсын Бангкок зэрэг хотуудад Гванжугийн уран бүтээлчдийг танилцуулсаар ирсэн байна.
Зүүн: И И Нам. Баруун: Ё.Төгөлдөр. Гэрэл зургийг: Монголын уран зургийн галерей.
Үзэсгэлэнд Гванжугийн зургаан уран бүтээлч болох Пак Сан Хва (Park Sang-hwa), Им Юн Хён (Lim Yong-hyun), Пак Сэ Хый (Park Se-hee), Мүн Чан Хван (Moon Chang-hwan), Жон Дог Ён (Jung Deok-yong) болон Монголын орчин үеийн дүрслэх урлагийн төлөөлөл болсон зургаан уран бүтээлч болох Ё.Төгөлдөр, Б.Номин, Г.Гэрэлхүү, Д.Дорждэрэм, Б.Хишигсүрэн, Э.Энхзаяа нарын нийт 30 гаруй бүтээлийг нэгтгэн толилуулжээ.
Гуанжү хотын дүрслэх урлагийн музейн куратор, судлаач Жон Хый Согын өгүүлснээр үзэсгэлэнд сонгогдсон уран бүтээлчид эгэл жирийн амьдралаас үлдсэн мөчүүд болон өөрийгөө танин мэдэхэд нөлөөлсөн сэдлүүдийг дүрслэн харуулахаас гадна Улаанбаатар болон Гванжу хотын өвөрмөц онцлогийг өөрсдийн урлагийн хэлээр илэрхийлэхийг зорьжээ.
Зүүн: Б.Хишигсүрэн. Баруун: Пак Сан Хва. Гэрэл зургийг: Монголын уран зургийн галерей.
Куратор Жон Хый Согын тодорхойлсноор энэхүү үзэсгэлэн нь бие даасан арван хоёр өгүүлэмжээс бүрдэх боловч эдгээр арван хоёр өөр өнцөг хоорондоо сүлжилдэн холбогдох аж. Үзэсгэлэнгийн нэрийн хувьд эдгээр уран бүтээлчид өөр өөр түүхэн нөхцөл, соёлын орчин ба оршин буй газар нутгийнхувьд ялгаатай байвч Улаанбаатар болон Гванжугийн уран бүтээлчид бие биеэ гэрэлтүүлэн, бие биеийнхээ дуу хоолойгоор хөглөгдөнө гэсэн санааг агуулна.
Зүүн: Д.Дорждэрэм. Баруун: Им Юн Хён. Гэрэл зургийг: Монголын уран зургийн галерей.
Зүүн: Б.Номин. Баруун: Э.Энхзаяа. Гэрэл зургийг: Монголын уран зургийн галерей.
Хүн ба байгалийн харилцан шүтэлцээ, мэдрэмж ба дурсамж, уламжлал ба ижилсэл гэсэн сэдвүүдийг Солонгос ба Монгол уран бүтээлчид бүтээлдээ хэрхэн тусгаж, илэрхийлснийг мөн өөр хоорондоо харилцаж, зарим тохиолдолд эсрэгцэж буйг үзэгчид олж харах боломжийг “Бие биедээ тусах гэрэл” үзэсгэлэн олгожээ.
Зүүн: Пак Сэ Хый. Баруун: Жон Дог Ён. Гэрэл зургийг: Монголын уран зургийн галерей.
