Хөх Нар Орчин Үеийн Урлагийн Төвийн “CAB” урлагийн орон зайг танилцуулж байна
Монголын орчин үеийн урлагийн томоохон төлөөлөл болох Хөх Нар Орчин Үеийн Урлагийн Төв “CAB” нэртэй уран бүтээлчдийн орон зайг нээж орчин үеийн урлагийн олон талт илэрхийлэл, туршилт, судалгаа, хамтын ажиллагааг дэмжих зорилготойгоор үйл ажиллагаагаа явуулж эхлээд байна.
Хөх Нар Монголын Орчин Үеийн Урлагийн Төв нь 2002 онд байгуулагдсан цагаасаа эхлэн Монголын орчин үеийн урлагийн уран бүтээлчдэд чиглэсэн хөтөлбөрүүдийг идэвхтэй зохион байгуулсаар ирсэн билээ. Хөх Нар Төвийн хувьд Улаанбаатар театр, Байгалийн түүхийн музей гэх мэтчилэн өөр өөр байршлууд, орон зайд үйл ажиллагаагаа явуулж үзэсгэлэн, арга хэмжээнүүдийг зохион байгуулсаар ирсэн бол энэ удаад “САВ” орон зайгаар дамжуулан биет орон зайд эргэн ирлээ.
Нэрийн хувьд хоёр утгыг илэрхийлэх бөгөөд латинаар “CAB” нь Contemporary Art Bar буюу орчин үеийн урлагийн бар гэсэн үгийн товчлол бол харин кириллээр уншвал “САВ” буюу ямарваа нэгэн зүйлийг агуулах, дүүргэх сав гэсэн утгыг агуулна. Тэгвэл энэ савыг юугаар дүүрэх вэ? “CAB” нь уран бүтээлчдийн үзэсгэлэн, перформанс, видео арт, судалгаанд суурилсан төсөл, хэлэлцүүлэг, боловсролын хөтөлбөрүүдийг хэрэгжүүлэх орон зай бөгөөд орчин үеийн урлагийг олон нийтэд ойртуулж, үзэгчидтэй шууд харилцах боломжийг бүрдүүлэхийн зэрэгцээ Монголын орчин үеийн урлагийг олон улсын түвшинд холбох чухал платформ болохоор зорьж байгаа юм байна.
"САВ" урлагийн орон зайг Хөх Нар Төвийн гишүүд хамтран байгуулсан бөгөөд уран бүтээлчид өөрсдөө үйл ажиллагааг нь хариуцан авч явна. Тэдний зүгээс Хөх нар төвийн гишүүн байхаас үл хамааран төрөл бүрийн уран бүтээлчидтэй хамтран ажиллахад нээлттэй бөгөөд дотоод, гадаадын уран бүтээлчдийн хамтарсан төслүүд, судалгаа, солилцоог идэвхтэй дэмжин ажиллана гэдгийг онцолсон юм.
Гэрэл зургийг: artpress.mn
2026 оны 1-р сарын 27- ний өдөр нээгдсэн цагаас хойш “CAB” урлагийн орон зайд уран бүтээлч Б.Хишигсүрэнгийн "Хулан" үзэсгэлэн, Б.Цэрэннямын “Psychedelicprism ба Demi Moors” гэрэл зургийн үзэсгэлэн, нээлттэй микрофон болон дуу хөгжмийн олон арга хэмжээ зохион байгуулагдсан байна. Харин дараачийн арга хэмжээ болох уран бүтээлч Б.Бат-Эрдэний “Савдаг” үзэсгэлэн маргааш буюу 2026 оны 3-р сарын 10-ны өдөр нээлтээ хийх бөгөөд 3-р сарын 14 хүртэл үргэлжилнэ.
“CAB” урлагийн орон зай
Хаяг: Төв шуудангийн хойно, Монтел төвийн баруун хойно, Эрдэнэс Таван толгой оффисийн баруун талд, Гэрэл төвийн 1-р давхар
И-мэйл: cab.ulaanbaatar@gmail.com
Instagram: @khukhnar.cab
