CAB урлагийн орон зайд үйл хөдлөлийн урлагийн үдэш болно

Перформанс буюу үйл хөдлөлийн урлаг нь уран бүтээлчид өөрийн боловсруулсан сэдэв, санаа, хөтөлбөрөө үйл хөдлөлөөр дамжуулан илэрхийлдэг орчин үеийн урлагийн нэгэн төрөл. 

"Хөх нар" орчин үеийн урлагийн төвийн үүсгэн байгуулагч, куратор Ё.Далх-Очирын онцолсноор Монголд энэ төрлийн үйлдлийн урлагийг 2004 онд анх удаа зохиолч, яруу найрагч Б.Сэргэлэн “Хөх Нар” контемпорари арт галерейд толилуулж байжээ. Түүнээс хойш 2005-2009 оны хооронд “Арт кэмп” олон улсын хөтөлбөрт уран бүтээлч Б.Сэргэлэн, Т.Энхболд, С.Ганзүг нар үйл хөдлөлийн урлагаар оролцон урлагийн гараагаа эхлүүлж байсан ба үйлдлийн урлагаар дамжуулан олон улсад өөрийгөө таниулж чадсан уран бүтээлчид болцгоосон байна. Т.Энхболд ба С.Ганзүг нар нь 2015 онд болсон 56 дахь Венецийн Биеннальд үйл хөдлөлийн урлагийн үзүүлбэрүүдээ тус хотын гудамж талбайд үзүүлж байсан нь Монголын орчин үеийн урлагийн түүхэнд бичигдэх чухал перформанс болж байжээ.

Үүнээс гадна “Нүүдэлчдийн Давалгаа” үйлдлийн урлагийн хамтлагийг уран бүтээлч Г.Энхжаргал, Б.Мөнхцэцэг, Ж.Болортүвшин, Г.Шийлэгмаа, Б.Дөлгөөн, Э.Энхзаяа, Ж.Анунаран нар үүсгэн байгуулж өөрсдийн концепт хөтөлбөрөө өрөг, медиа, үйл хөдлөлийн урлагтай уялдуулан хамтарсан олон үзүүлбэрээ толилуулж байсан нь Монголын орчин үеийн урлагт нэгэн шинэ давалгаа болж байсан билээ.  

Энэхүү урлагийн төрлийг Монголд хөгжихөд чухал хувь нэмэр оруулсан "Хөх нар" орчин үеийн урлагийн төвийн САВ урлагийн орон зайд 4-р сарын 9-ний өдөр таван уран бүтээлч үйл хөдлөлийн урлагийн бүтээлээ олны хүртээл болгох юм. Тус арга хэмжээний куратораар Ё.Далх-Очир ажилласан бөгөөд тэрээр үйл хөдлөлийн урлагийн талаарх илтгэл танилцуулсны дараа уран бүтээлч Д.Бадам “Лусын аялал”, Ж.Болортүвшин “Гэрлэн хэллэг”, Р.Чинзориг “Тархиа сунга”, Күкэнэ (Ц.Хулан) “Rosas danst rosas”, EYELEND (О.Анхбаяр) “Дуудлага” зэрэг бүтээлээ тус тус толилуулна.

“CAB” урлагийн орон зай

Хаяг: Төв шуудангийн хойно, Монтел төвийн баруун хойно, Эрдэнэс Таван толгой оффисийн баруун талд, Гэрэл төвийн 1-р давхар