61 дэх Дүрслэх урлагийн Венецийн Биенналийн олон улсын үзэсгэлэнгийн кураторын багийг танилцуулж байна
Венецийн Биенналийн олон улсын үзэсгэлэн “Минор түлхүүрийн аянд” (In Minor Keys) нэрийн дор 2026 оны 5-р сард нээнэ.
61 дэх Дүрслэх урлагийн Венецийн Биенналь олон улсын үзэсгэлэн 2026 оны 5-р сарын 9-өөс 11-р сарын 22 хүртэл Италийн Венец хотноо “Минор түлхүүрийн аянд” нэрийн дор зохион байгуулагдана.
Тус үзэсгэлэнгийн ерөнхий куратороор Өмнөд Африкийн Зиетс орчин үеийн музейн захирал, куратор Койо Коүо сонгогдсон болохыг 2024 оны 12-р сарын 3-ны өдөр зарлаад байсан билээ. Харамсалтай нь куратор Койо Коүо нь 57 насандаа зуурдаар нас барсан талаар энэ оны 5-р сарын 10-нд Венецийн Биенналийн зүгээс мэдээлжээ.
Үзэсгэлэнгийн нэр, удирдамжийг ерөнхий куратор Койо Коүогийн анх санаачилснаар, түүний гэр бүлийн дэмжлэгтэйгээр үргэлжлүүлэн авч явахаа Венецийн Биенналийн зохион байгуулагчид зарласан бөгөөд үүгээрээ түүний гэгээн дурсгалыг хүндэтгэн үйл хэргийг үргэлжлүүлэхийг зорьж буйгаа илэрхийлжээ.
Куратор Койо Коүо нь үзэсгэлэнгийн нэрийг “Минор түлхүүрийн аянд” хэмээн тодорхойлсноо 2025 оны 4-р сарын 8-ны өдөр Биенналийн ерөнхийлөгчид илгээсэн хэвлэлийн мэдээ болон кураторын бичвэртээ дурдсан байна.
Тэрээр "2024 оны 10-р сард Дүрслэх урлагийн Биенналийн 61 дэх удаагийн куратороор томилогдсон нь миний хувьд нэр төрийн хэрэг. Үзэсгэлэнгийн куратороор удирдан чиглүүлэх философийн хүрээг тантай болон танай хамт олонтой өнөөдөр хуваалцаж байгаадаа баяртай байна" хэмээн бичиж байжээ.
Венецийн Биенналийн зохион байгуулагчид куратор Койо Коүогийн өөрийн сонгосон баг хамт олонтой зөвлөлдөн ажиллаж байгаа бөгөөд тус багийн бүрэлдэхүүнд зөвлөх Гэйб Бэкхурст Фейхо (Gabe Beckhurst Feijoo), Мари Хэлэн Пэрэира (Marie Helene Pereira), Раша Салти (Rasha Salti), ерөнхий редактор Сидхарта Миттер (Siddhartha Mitter) болон туслах Рори Цапаи (Rory Tsapayi) нар багтана.
