Их Британийг төлөөлж 61 дэх Венецийн Биеннальд оролцох уран бүтээлч болон кураторын багтай танилцья
Их Британи улсын хувьд Венецийн Биенналийн дүрслэх урлаг болон архитектурын үзэсгэлэн тус бүрд улсаа төлөөлөн оролцох уран бүтээлчдийн сонгон шалгаруулалт болон үзэсгэлэнг зохион байгуулах ажлыг Британийн Зөвлөл (British Council) байгууллага 1937 оноос хойш хариуцсаар иржээ. Британийн Зөвлөл нь Их Британийн олон улсын соёлын харилцаа хариуцсан байгууллага юм.
1909 оноос хойш Венецийн Биеннальд Их Британийг төлөөлөн Ж.М.В.Тернерээр авхуулаад Трейси Эмин зэрэг нийт 600 гаруй уран бүтээлч бүтээл, үзэсгэлэнгээ толилуулжээ.
61 дэх Биеннальд Их Британийн нэрт уран бүтээлч Лубайна Химид улсаа төлөөлөн шинэ уран бүтээлийн томоохон бие даасан үзэсгэлэн гаргахаар болсныг Британийн Зөвлөл байгууллагаас 2025 оны 2-р сард зарласан.
Тэрээр арьс өнгөний үзэл, феминизм, түүх соёлын ой санамж зэрэг сэдвүүдийг хөндсөн бүтээлүүдээрээ түүчээлсээр ирсэн алдартай уран бүтээлч юм. Любайна Химид нь бүтээлдээ Европ төвт сэтгэлгээ, өгүүлэмжийг эсэргүүцэж, Өрнийн түүхэнд хар арьст хүмүүсийн үл тоомсорлосоор ирсэнийг онцлон харуулахын тулд түүхэн судалгааг байнга ашигладаг.
Их Британийн хар арьс уран бүтээлчдийн хөдөлгөөний анхдагчдын нэг Лубайна Химид 1980-1990-ээд онд урлагийн ертөнц дэхь хар арьст уран бүтээлчдийн гадуурхлын асуудлыг хөндсөн чухал үзэсгэлэнгүүдийн куратороор ажиллаж байжээ. Лубайна Химид 2017 онд Их Британий тэргүүлэх дүрслэх урлагийн шагнал болох Тернерийн шагналыг хүртсэн билээ.
Харин үзэсгэлэнгийн туслах куратороор Эсэ Оножэрүо уран бүтээлч Лубайна Химидтай гар нийлэн ажиллахаар болсон байна. Тэрээр куратороос гадна кино продюсер бөгөөд уран бүтээлчид болон коллективуудтай хамтран уран бүтээлийг нь дэмжих, олон нийтийн хүртээл болгох хөтөлбөрүүдийг боловсруулах арвин туршлагатай нэгэн аж.
Туслах кураторын албан тушаалыг Их Британий филантропист, орчин үеийн урлагийн цуглуулагч Шэйн Акеройд 10 жилийн турш дэмжиж ажиллахаа амласны дагуу энэ удаад гурав дахь жилдээ ивээн тэтгэж байгаа юм байна.
